ఇంద్రధనుస్సు

క్షీర సాగర తరంగ శీకరాసార తారకిత చారుమూర్తయే! భోగిభోగ శయనీయశాయినే మాధవాయ మధువిద్విషే నమ:!! క్షీరసాగర తరంగ = పాలకడలి అలల యొక్క శీకరాసార = బిందువులచేత నింపబడిన తారకిత చారుమూర్తయే = చుక్కలు కలిగిన అందమైన వానికి భోగి భోగ శయనీయ శాయినే = ఆదిశేషుని పై పవళించిన వానికి మాధవాయ = మాధవునకు మధువిద్విషే = మధు అను రాక్షసునకు శత్రువైన వానికి నమః = జోత. శ్రీ మహావిష్ణువు పాలకడలిలో ఆదిశేషునిపై పవళించి ఉన్నాడు. ఆ పాలకడలి తరంగాల తుంపరలు ఆయన నల్లని తనువుపైన అక్కడక్కడా చింది ఆకాశంలో చుక్కల్లా మెరుస్తున్నాయి. అలాంటి మహావిష్ణువుకు నమస్కారం. *********************************************** తెలుగు భాష నేర్చుకునేప్పుడు మొట్టమొదటగా వేమన పద్యాలు, చిన్న చిన్న పొడుపు కథలూ, సుమతీశతక పద్యాలు, పోతన భాగవతపద్యాలు - ఇలా ఆరంభిస్తాం. సంస్కృతాధ్యయనం లోనూ ఒక వరుస ఉంది. మొదట బాలరామాయణం, అమరకోశం, శబ్దమంజరీ, ముకుంద మాల, ధాతువులూ, భర్తృహరి, ఆపైన రఘువంశం, కుమారసంభవం.... పై వరుసలో ముకున్దమాల ఉండటమే ఆ మహనీయమైన స్తోత్ర కావ్యం గొప్పతనాన్ని చెప్పక చెబుతుంది. విశిష్టాద్వైత మతం - అందుకు సంబంధించిన భక్తి సాహిత్యం అనర్ఘ, అమూల్య రత్నాలను ...